விலங்குகள், பறவைகள், பொருட்கள், தொழில்கள் முதலியவற்றைக் குறித்துக்காட்ட, தமிழர் வழிவழியாகப் பல சொற்களைப் பயன்படுத்தி வந்துள்ளனர். அச்சொற்கள் தமிழ் மொழியின் பண்பையும், தமிழரின் நாகரிகத்தையும் உணர்த்துகின்றன.

• ஆண் குரங்கை கடுவன் எனவும், பெண் குரங்கை மந்தி எனவும் கூறுவது தமிழ் மரபாகும்.
• ஆண் குரங்கை Male Monkey எனவும், பெண் குரங்கை Female Monkey எனவும் கூறுவது ஆங்கில மரபாகும்.

சொல்வளம் மிக்க தமிழில் எண்ணற்ற மரபுச்சொற்களும் மரபுத் தொடர்களும் உள்ளன. ஒரு மொழியில் உள்ள மரபுத் தொடர்களை அப்படியே வேறொரு மொழியில் மொழி பெயர்ப்பது கடினம். சொல்லுக்குச் சொல் மொழிபெயர்த்தால் அம்மரபுத்தொடரின் பொருள் மாறிவிடும். எனவே, ஒரு மொழியின் மரபுத்தன்மையை அறிந்து மொழி பெயர்க்க வேண்டும்.

He Kicked the bucket – என்பதை, “அவன் வாளியை உதைத்தான்” என மொழிபெயர்த்தால், அது தவறான மொழி பெயர்ப்பு ஆகும். “அவன் இறந்துவிட்டான்” என்பதே இத்தொடர் உணர்த்தும் பொருளாகும். எனவே, மரபுச்சொல் / மரபுத்தொடர் என்பது, சொற்றொடர் வேறாகவும், அச்சொற்றொடர் உணர்த்தும் கருத்து வேறாகவும் இருக்கும்.

மூவாயிரம் ஆண்டுகளுக்கு முன் வாழ்ந்த தொல்காப்பியர், தாம் இயற்றிய இலக்கண நூலான தொல்காப்பியத்தில் ‘மரபியல்’ என்னும் ஓர் இயலையே உருவாக்கியுள்ளார். இதன் வாயிலாக, அவருடைய காலத்திற்கு முன் வாழ்ந்த மக்களும் தொன்றுதொட்டு மரபுச் சொற்களையும் தொடர்களையும் பயன்படுத்தி வந்துள்ளனர் என அறியமுடிகிறது. எனவே, நம் முன்னோர்களால் தொன்றுதொட்டு வழங்கி வந்த தொடர்களை நாமும் பயன்படுத்துவதால், அவை மரபுத்தொடர் எனப்படுகின்றன.

சில மரபுச் சொற்களையும் தொடர்களையும் இங்குக் காண்போம்