இக்கால இலக்கண மரபும் தொடரமைப்பும் எனும் இவ்வலகில், இக்கால இலக்கணத்தின் பயன்பாடு பற்றியும் தேவை பற்றியும் விளக்கப்பட்டுள்ளன. தொடர் அமைப்பும் விளக்கப்பட்டுள்ளது.

படிநிலை இலக்கணங்கள் தோன்றினால் தான் இலக்கண அறிவும் இலக்கண ஆராய்ச்சியும் வளரமுடியும். அத்தகைய வளர்ச்சிக்கு உதவும் வகையில், தொடக்கநிலை மாணவர்களுக்கென்றும், உயர்நிலை மாணவர்களுக்கென்றும், மேல்நிலை மாணவர்களுக்கென்றும் தனி இலக்கணம் அமைதல் வேண்டும். இவை மட்டுமல்லாமல், எல்லாருக்கும் பயன்படத்தக்க வகையில், சொற்பொருள் விளங்காதபோது, அகராதியைப் பயன்படுத்துவது போல, மொழியில் நமக்கு ஏற்படும் ஐயங்களைப் போக்கிக்கொள்ளத் தக்க வகையில் நோக்குநிலை இலக்கணம் தமிழில் தோன்ற வேண்டும். யார்க்கு ஐயம் ஏற்பட்டாலும் அவர்கள் ஐயத்தைத் தீர்த்துக்கொள்ளும் வகையில் அகர வரிசையில் செய்திகளை வழங்குகின்ற ஒரு நோக்குநிலை இலக்கணமும் தமிழுக்குத் தேவை.