Primary tabs
-
6.0 பாட முன்னுரை
இன்றைய மொழியியல் வல்லுநரும் வியக்கும்படியாகச் சொற்பொருள் வளங்கள், தொல்காப்பியம் எனும் மாபெரும் இலக்கணப் பேழையில் புதைந்து கிடக்கின்றன. தமிழ்மொழியிலுள்ள சொற்பொருள் மாற்றங்கள், தொல்காப்பியத்தை அடிப்படையாகக் கொண்டு ஆராயப்படுகின்றன. எனவே, தமிழ்மொழி வரலாறு தொல்காப்பியத்திலிருந்தே தொடங்குவதாகக் கொள்ளலாம். தமிழ்மொழியின் வரலாற்றுக்கான அடிப்படைச் சான்றுகளாகப் பெரும்பாலும் இலக்கியங்களையே கொள்ளவேண்டி உள்ளது.
வரலாற்றில், பல்வேறு காலகட்டங்களில் அரசியல், பண்பாடு, வாணிகம் முதலான வேறுபட்ட சூழ்நிலைகளால் தமிழ்மொழி பலவிதமான மாற்றங்களுக்கு உள்ளாகத் தொடங்கியது. இயற்சொற்களிலும் (native words) தொடர்ச்சியான பொருள்மாற்றங்கள் நிகழ்ந்தவண்ணம் இருந்தன. சமுதாயத்தில், காலத்திற்குக் காலம், நிகழ்ந்த வளர்ச்சிப் போக்குகளை எடுத்துக்காட்டும் வகையில் இம்மாற்றங்கள் நிகழ்ந்தன. ஒருசொல், தன் பொருள் எல்லையிலிருந்து வேறொரு எல்லைக்கு மாற்றமடையத் தொடங்கியது.
பல்வேறு காலங்களில் ஏற்பட்ட இத்தகைய சொற்பொருள் மாற்றங்களை எல்லாம் தகுந்த சான்றுகளுடன் வழங்கி, அவற்றை விளக்குவதாக இப்பாடம் அமைந்துள்ளது.