தானம் தாங்கிச் சீலந் தலைநின்று

போன பிறப்பில் புகுந்ததை உணர்ந்தோள்

புத்த தன்ம சங்கம் என்னும்

முத்திற மணியை மும்மையின் வணங்கிச்

சரணா கதியாய்ச் சரண்சென்று அடைந்தபின்

முரணாத் திருவற மூர்த்தியை மொழிவோன்

அறிவு வறிதாய் உயிர்நிறை காலத்து

முடிதயங்கு அமரர் முறைமுறை இரப்பத

துடித லோகம் ஒழியத் தோன்றிப்

போதி மூலம் பொருந்தி இருந்து

மாரனை வென்று வீரன் ஆகிக்

குற்றம் மூன்றும் முற்ற அறுக்கும்

வாமன் வாய்மை ஏமக் கட்டுரை

இறந்த காலத்து எண்ணில்புத் தர்களும

சிறந்துஅருள் கூர்ந்து திருவாய் மொழிந்தது

ஈரறு பொருளின் ஈந்தநெறி உடைத்தாய்ச்

சார்பின் தோன்றித் தத்தமில் மீட்டும்

இலக்குஅணத் தொடர்தலின்

மண்டில வகையாய் அறியக் காட்டி

எதிர்முறை ஒப்ப மீட்சியும் ஆகி

ஈங்குஇது இல்லா வழிஇல் லாகி

ஈங்குஇது உள்ள வழிஉண் டாகலில்

தக்க தக்க சார்பில் தோற்றம்எனச்

சொற்றகப் பட்டும் இலக்கணத் தொடர்பால்

கருதப் பட்டும் கண்டம்நான்கு உடைத்தாய்

மருவிய சந்தி வகைமூன்று உடைத்தாய்த்

தோற்றம் பார்க்கின் மூன்று வகையாய்த்

தோற்றற்கு ஏற்ற காலம்மூன்று உடைத்தாய்க்

குற்றமும் வினையும் பயனும் விளைந்து

நிலையில வறிய துன்பம்என நோக்க

உலையா வீட்டிற்கு உறுதி யாகி

நால்வகை வாய்மைக்குச் சார்பிடன் ஆகி

ஐந்துவகைக் கந்தத்து அமைதி ஆகி

மெய்வகை ஆறு வழக்குமுகம் எய்தி

நயங்கள் நான்கால் பயன்கள் எய்தி

இயன்றநால் வகையால் வினாவிடை உடைத்தாய்

நின்மதி இன்றி உழ்பாடு இன்றிப்

பின்போக் கல்லது பொன்றக் கெடாதாய்ப்

பண்ணுநர் இன்றிப் பண்ணப் படாதாய்

யானும் இன்றி என்னதும் இன்றிப்

போனதும் இன்றி வந்ததும் இன்றி

முடித்தலும் இன்றி முடிவும் இன்றி

வினையும் பயனும் பிறப்பும் வீடும்

இனையன எல்லாம் தானே ஆகிய

பேதைமை செய்கை உணர்வே அருவுரு

வாயில் ஊறே நுகர்வே வேட்கை

பற்றே பவமே தோற்றம் வினைப்பயன்

இற்றுஎன வகுத்த இயல்புஈ ராறும்

பிறந்தோர் அறியின் பெரும்பேறு அறிகுவர்

அறியார் ஆயின் ஆழ்நரகு அறிகுவர்

பேதைமை என்பது யாதுஎன வினவின்

ஓதிய இவற்றை உணராது மயங்கி

இயற்படு பொருளால் கண்டது மறந்து

முயல்கோடு உண்டுஎனக் கேட்டது தெளிதல்

உலகம் மூன்றினும் உயிராம் உலகம்

அலகில பல்உயிர் அறுவகைத்து ஆகும்

மக்களும் தேவரும் பிரமரும் நரகரும்

தொக்க விலங்கும் பேயும் என்றே

நல்வினை தீவினை என்றுஇரு வகையால்

சொல்லப் பட்ட கருவில் சார்தலும்

கருவில் பட்ட பொழுதினுள் தோற்றி

வினைப்பயன் விளையும் காலை உயிர்கட்கு

மனப்பேர் இன்பமும் கவலையும் காட்டும்

தீவினை என்பது யாதுஎன வினவின்

ஆய்தொடி நல்லாய் ஆங்குஅது கேளாய்

கொலையே களவே காமத் தீவிழை

உலையா உடம்பில் தோன்றுவ மூன்றும்

பொய்யே குறளை கடுஞ்சொல் பயனில்

சொல்எனச் சொல்லிற் தோன்றுவ நான்கும்

வெஃகல் வெகுளல் பொல்லாக் காட்சிஎன்று

உள்ளம் தன்னின் உருப்பன மூன்றும்எனப்

பத்து வகையால் பயன்தெரி புலவர்

இத்திறம் படரார் படர்குவர் ஆயின்

விலங்கும் பேயும் நரகரும் ஆகிக்

கலங்கிய உள்ளக் கவலையில் தோன்றுவர்

நல்வினை என்பது யாதுஎன வினவின்

சொல்லிய பத்தின் தொகுதியின் நீங்கிச்

சீலம் தாங்கித் தானம் தலைநின்று

மேல்என வகுத்த ஒருமூன்று திறத்துத்

தேவரும் மக்களும் பிரமரும் ஆகி

மேவிய மகிழ்ச்சி வினைப்பயன் உண்குவர்

உணர்வுஎனப் படுவது உறங்குவோர் உணர்வின்

புரிவுஇன்று ஆகிப் புலன்கொளா ததுவே

அருவுரு என்பதுஅவ் வுணர்வு சார்ந்த

உயிரும் உடம்பும் ஆகும் என்ப

வாயில் ஆறும் ஆயும் காலை

உள்ளம் உறுவிக்க உறும்இடன் ஆகும்

ஊறுஎன உரைப்பது உள்ளமும் வாயிலும்

வேறு புலன்களை மேவுதல் என்ப

நுகர்வே உணர்வு புலன்களை நுகர்தல்

வேட்கை விரும்பி நுகர்ச்சிஆ ராமை

பற்றுஎனப் படுவது பசைஇய அறிவே

பவம்எனப் படுவது கரும ஈட்டம்

தருமுறை இதுஎனத் தாம்தாம் சார்தல்

பிறப்புஎனப் படுவதுஅக் கருமப் பெற்றியின்

உறப்புணர் உள்ளம் சார்பொடு கதிகளில்

காரண காரிய உருக்களில் தோன்றல்

பிணிஎனப் படுவது சார்பில் பிறிதாய்

இயற்கையின் திரிந்துஉடம்பு இடும்பை புரிதல்

மூப்புஎன மொழிவது அந்தத்து அளவும்

தாக்குநிலை யாமையின் தாம்தளர்ந் திடுதல்

சாக்காடு என்பது அருவுருத் தன்மை

யாக்கை வீழ்கதிர் எனமறைந் திடுதல்

பேதைமை சார்வாச் செய்கை ஆகும்

செய்கை சார்வா உணர்ச்சி ஆகும்

உணர்ச்சி சார்வா அருவுரு ஆகும்

அருவுருச் சார்வா வாயில் ஆகும்

வாயில் சார்வா ஊறுஆ கும்மே

ஊறு சார்ந்து நுகர்ச்சி ஆகும்

நுகர்ச்சி சார்ந்து வேட்கை ஆகும்

வேட்கை சார்ந்து பற்றுஆ கும்மே

பற்றில் தோன்றும் கருமத் தொகுதி

கருமத் தொகுதி காரண மாக

வருமே ஏனை வழிமுறைத் தோற்றம்

தோற்றம் சார்பின் மூப்புப்பிணி சாக்காடு

அவலம் அரற்றுக் கவலைகை யாறுஎனத்

தவல்இல் துன்பம் தலைவரும் என்ப

ஊழின்மண் டிலமாச் சூழும்இந் நுகர்ச்சி

பேதைமை மீளச் செய்கை மீளும்

செய்கை மீள உணர்ச்சி மீளும்

உணர்ச்சி மீள அருவுரு மீளும

அருவுரு மீள வாயில் மீளும்

வாயில் மீள ஊறு மீளும்

ஊறு மீள நுகர்ச்சி மீளும்

நுகர்ச்சி மீள வேட்கை மீளும்

வேட்கை மீளப் பற்று மீளும்

பற்று மீளக் கருமத் தொகுதி

மீளும் கருமத் தொகுதி மீளத்

தோற்றம் மீளும் தோற்றம் மீளப்

பிறப்பு மீளும் பிறப்புப் பிணிமூப்புச்

சாக்காடு அவலம் அரற்றுக் கவலை

கையாறு என்றுஇக் கடையில் துன்பம்

எல்லாம் மீளும்இவ் வகையான் மீட்சி

ஆதிக் கண்டம் ஆகும் என்ப

பேதைமை செய்கை என்றுஇவை இரண்டும்

காரண வகைய ஆத லானே

இரண்டாம் கண்டம் ஆகும் என்ப

உணர்ச்சி அருவுரு வாயில் ஊறே

நுகர்ச்சி என்று நோக்கப் படுவன

முன்னவற்று இயல்பால் துன்னிய ஆதலின்

மூன்றாம் கண்டம் வேட்கை பற்றுக்

கரும ஈட்டம் எனக்கட் டுரைப்பவை

மற்றுஅப் பெற்றி நுகர்ச்சி ஒழுக்கினுள்

குற்றமும் வினையும் ஆக லானே

நான்காம் கண்டம் பிறப்பே பிணியே

மூப்பே சாவுஎன மொழிந்திடும் துன்பம்

எனஇவை பிறப்பில் உழக்குபயன் ஆதலின்

பிறப்பின் முதல்உணர்வு ஆதிச் சந்தி

நுகர்ச்சி ஒழுக்கொடு விழைவின் கூட்டம்

புகர்ச்சிஇன்று அறிவது இரண்டாம் சந்தி

கன்மக் கூட்டத் தொடுவரு பிறப்பிடை

முன்னிச் செல்வது மூன்றாம் சந்தி

மூன்றுவகைப் பிறப்பு மொழியுங் காலை

ஆன்றபிற மார்க்கத்து ஆய உணர்வே

தோன்றல் வீடுஎனத் துணிந்து தோன்றியும்

உணர்வுள் அடங்க உருவாய்த் தோன்றியும்

உணர்வும் உருவும் உடங்கத் தோன்றிப்

புணர்தரு மக்கள் தெய்வம்விலங்கு ஆகையும்

கால மூன்றும் கருதுங் காலை

இறந்த காலம் என்னல் வேண்டும்

மறந்த பேதைமை செய்கையால் அவற்றை

நிகழ்ந்த காலம்என நேரப் படுமே

உணர்வே அருவுரு வாயில் ஊறே

நுகர்வே வேட்கை பற்றே பவமே

தோற்றம் என்றுஇவை சொல்லுங் காலை

எதிர்கா லம்என இசைக்கப் படுமே

பிறப்பே பிணியே மூப்பே சாவே

அவலம் அரற்றுக் கவலைகை யாறுகள்

குலவிய குற்றம்எனக் கூறப் படுமே

அவாவே பற்றே பேதைமை என்றுஇவை

புனையும்அடை பவமும் வினைசெயல் ஆகும்

உணர்ச்சி அருவுரு வாயில் ஊறே

நுகர்ச்சி பிறப்பு மூப்புப்பிணி சாவுஇவை

நிகழ்ச்சிப்பயன் ஆங்கே நேருங் காலைக்

குற்றமும் வினையும் பயனும் துன்பம்

பெற்ற தோற்றப் பெற்றிகள் நிலையா

எப்பொரு ளுக்கும் ஆன்மா இலைஎன

இப்படி உணரும் இவைவீட் டியல்பாம்.

உணர்வே அருவுரு வாயில் ஊறே

நுகர்வே பிறப்பே பிணிமூப்புச் சாவே

அவலம் அரற்றுக் கவலைகை யாறுஎன

நுவலப் படுவன நோயா கும்மே

அந்நோய் தனக்குப்

பேதைமை செய்கை அவாவே பற்றுக்

கரும ஈட்டம்இவை காரணம் ஆகும்

துன்பம் தோற்றம் பற்றே காரணம்

இன்பம் வீடே பற்றுஇலி காரணம்

ஒன்றிய உரையே வாய்மை நான்காவது

உருவு நுகர்ச்சி குறிப்பே பாவனை

உள்ள அறிவுஇவை ஐங்கந்தம் ஆவன

அறுவகை வழக்கு மறுஇன்று கிளப்பின்

தொகையே தொடர்ச்சி தன்மை மிகுத்துரை

இயைந்துரை என்ற நான்கினும் இயைந்த

உண்மை வழக்கும் இன்மை வழக்கும்

உள்ளது சார்ந்த உண்மை வழக்கும்

இல்லது சார்ந்த இன்மை வழக்கும்

உள்ளது சார்ந்த இன்மை வழக்கும்

இல்லது சார்ந்த உண்மை வழக்கும்என,

சொல்லிய தொகைத்திறம் உடம்புநீர் நாடு

தொடர்ச்சி வித்து முளைதாள் என்றுஇந்

நிகழ்ச்சியில் அவற்றை நெல்என வழங்குதல்

இயல்பு மிகுத்துஉரை ஈறுடைத்து என்றும்

தோன்றிற்று என்றும் மூத்தது என்றும்

மூன்றின் ஒன்றின் இயல்புமிகுத்து உரைத்தல்

இயைந்துரை என்பது எழுத்துப்பல கூடச்

சொல்எனத் தோற்றும் பலநாள் கூடிய

எல்லையைத் திங்கள் என்று வழங்குதல்

உள்வழக்கு உணர்வுஇல் வழக்கு முயல்கோடு

உள்ளது சார்ந்த உள்வழக்கு ஆகும்

சித்தத் துடனே ஒத்த நுகர்ச்சி

உள்ளது சார்ந்த இல்வழக்கு ஆகும்

சித்தம்உற் பவித்தது மின்போல் என்கை

இல்லது சார்ந்த உண்மைவழக்கு ஆகும்

காரணம் இன்றிக் காரியம் நேர்தல்

இல்லது சார்ந்த இல்வழக்கு ஆகும்

முயல்கோடு இன்மையின் தோற்றமும் இல்எனல்.

நான்கு நயம்எனத் தோன்றப் படுவன

ஒற்றுமை வேற்றுமை புரிவின்மை இயல்புஎன்க.

காரண காரியம் ஆகிய பொருள்களை

ஒன்றா உணர்தல் ஒற்றுமை நயமாம்

வீற்றுவீற் றாக வேதனை கொள்வது

வேற்றுமை நயம்என வேண்டல் வேண்டும்

பொன்றக் கெடாஅப் பொருள்வழிப் பொருள்களுக்கு

ஒன்றிய காரணம் உதவுகா ரியத்தைத்

தருதற்கு உள்ளம் தான்இலை என்றல்

புரிவின்மை நயம்எனப் புகறல் வேண்டும்

நெல்வித் தகத்துள் நெல்முளை தோற்றும்எனல்

நல்ல இயல்புநயம் இவற்றில்நாம் கொள்பயன்

தொக்க பொருள்அலது ஒன்றுஇல்லை என்றும்

அப்பொருள் இடைப்பற்று ஆகாது என்றும்

செய்வா னொடுகோட் பாடுஇலை என்றும்

எய்துகா ரணத்தால் காரியம் என்றும்

அதுவும் அன்றுஅது அலாததும் அன்றுஎன்றும்

விதிமுறை தொகையினால் விரிந்த நான்கும்

வினாவிடை நான்குஉள

துணிந்து சொல்லல் கூறிட்டு மொழிதல்

வினாவின் விடுத்தல் வாய்வா ளாமைஎனத்

தோன்றியது கெடுமோ கெடாதோ என்றால்

கேடுஉண்டு என்றல் துணிந்துசொலல் ஆகும்

செத்தான் பிறப்பா னோபிற வானோ

என்று செப்பின்

பற்றுஇறந் தானோ அன்மக னோஎனல்

மிகக்கூ றிட்டு மொழிதல்என விளம்புவர்

வினாவின் விடுத்தல் முட்டை முந்திற்றோ

பனைமுந் திற்றோ எனக்கட் டுரைசெய்

என்றால் எம்முட்டைக்கு எப்பனை என்றல்

வாய்வா ளாமை ஆகா யப்பூப்

பழைதோ புதிதோ என்று புகல்வான்

உரைக்கு மாற்றம் உரையாது இருத்தல்

கட்டும் வீடு அதன்கா ரணத்தது

ஒட்டித் தருதற்கு உரியோர் இல்லை

யாம்மேல் உரைத்த பொருள்கட்கு எல்லாம்

காமம் வெகுளி மயக்கம் காரணம்

அநித்தம் துக்கம் அநான்மா அசுசிஎனத்

தனித்துப் பார்த்துப் பற்றுஅறுத் திடுதல்

மைத்திரி கருணா முதிதைஎன்று அறிந்து

திருந்துநல் உணர்வால் செற்றம்அற் றிடுக

சுருதி சிந்தனா பாவனா தரிசனை

கருதி உய்த்து மயக்கம் கடிக

இந்நால் வகையால் மனத்துஇருள் நீங்குஎன்று

முன்பின் மலையா மங்கல மொழியின்

ஞான தீபம் நன்கனம் காட்ட,

தவத்திறம் பூண்டு தருமம் கேட்டுப்

பவத்திறம் அறுகெனப் பாவைநோற்றனள்என்.

பவத்திறம் அறுக எனப் காதைமுற்றிற்று.